'FryslânDOK sjocht fierder': Minsken en harren dreamen
Hjoed de lêste dei fan 'FryslânDOK sjocht fierder'. Dêryn giet it oer minsken en harren dreamen. Der wurde fjouwer films presintearre, út Nederlân, Roemenië en Poalen en der wurdt neipraat mei filmmakkers.
The ballet of service (Nederlân) 15'
Op The International Butler Academy yn Limburch wurde minsken fan oer de hiele wrâld oplaat ta butler foar de ryksten. Under hege druk leare se de iuwenâlde kneepkes fan it fak. In observearjende, licht-absurdistyske film, dy't de sjogger meinimt yn de hyperperfeksjonistyke wrâld fan it butlerskip.
Nij Each (Nederlân) 9'
Jelmer Remmers út Grou is okularist. Hy makket eachprotezes foar minsken dy't troch sykte of trauma in each ferlern hawwe. Jelmer en syn kollega Julios wurkje mei delikate presyzje oan it meitsjen fan in keunsteach, mei likefolle oandacht foar de pasjint. It is in wûnder yn dizze koarte film te folgjen hoe't sa'n proteze makke wurdt, en tagelyk sjogge we wat in nij each betsjut foar de ûntfanger.
God was here! (Roemenië, Nederlân) 27'
In leafdefolle dokumintêre fan de Roemeensk-Nederlânske filmregisseur Raluca Lupascu, oer in wûnder dat 85 jier lyn plakfûn yn Maglavit, in lyts doarpke yn Roemenië. Alle ynwenners, útsein skieppehoeder Lucian, leauwe yn dizze Godsferskining. Hy hat lykwols dit wûnder hurder nedich as dat er sels tinkt, en hy wrakselet tusken wol of net leauwe.
Olimpijczyk 'De Olympiër' (Poalen) 11'
It ferhaal fan in Poalske stâljonge, dy't twa hynders hat en ien grutte dream: hy wol meidwaan oan de Olympyske Spelen as springruter. Hy leart syn hynders hoe't se de hindernissen nimme moatte. Sels hat hy de heechste hindernis: de werklikheid. Wat, as syn dream by lange nei net útkomt, en hy syn libben lang dwaande is mei in sinleas besykjen?
Gasten
Hjoed oan tafel by Karen Bies, trije filmmakkers om nei te praten oer harren eigen dokumintêres; Marlies Smeenge de regisseur 'The ballet of service', Eline van Diggelen de regisseur fan 'Nij Each' en Raluca Lupascu de regisseur fan 'God was here!'
FryslânDOK sjocht fierder
'FryslânDOK sjocht fierder' is fan tiisdei 29 novimber oant en mei freed 2 desimber, fan 19.30 oant 21.30 oere te sjen by Omrop Fryslân.
'FryslânDOK sjocht fierder' is allinnich op telefyzje te sjen en wurdt nét online set.
Sjoch foar mear ynformaasje op omropfryslan.nl/fryslandok.
