De toan fan Jan Koops: "Randstad"

Neffens de keuning is et de hoogste tied en verstark de verbiening tussen et plattelaand en de stad. "Want", zo zee hi'j, "wat zou de Randstad zijn zonder de Regio? En de Regio zonder de Randstad?"

Dit vien ik dus een blunder van groot fermaot. Ommes de raandstad is iene van de regio's in Nederlaand. Deur ze tegen mekeer of te zetten maekt hi'j de raandstad tot 'primus inter pares", dat is tot eerste onder de gelieken.

Aj' op Google alliend mar 'randstad' intikken dan kriej' votdaolik as eerste risseltaot te zien 'Regio in Nederland'. Dan is et toch hiel vremd dat de keuning, die zegt te zuken naor verbiening tussen de stad en et plattelaand, juust de raandstad niet zigt as regio.

Votdaolik d'r aachteran zee de keuning ok nog dawwe preberen moeten "te ontsnappen aan vooroordelen. Laten we ervoor zorgen dat we elkaar niet verliezen!" Daor kan ik et vanzels alliend mar hielemaole mit iens wezen. Mar deur de raandstad niet as regio te zien benaodrokt hi'j toch juust et veuroordiel! En hi'j verliest mi'j deur die iene regio de raandstad toch weer apat te zetten van alle aanderen.

Aj' dat al as uutgaankspunt nemen, dan komt de oproep om te zuken naor verbiening uut een veur mi'j wat verdochte hoeke. Zol oonze keuning dezelde woorden bruukt hebben as hi'j niet zels in de regio Raandstad woond hebben zol, mar in een knap optrekkien argens op de Tachtig Bunder bi'j De Fochtel?

Awwe verbiening zuken moeten, waoromme gong de keuning dan in coronatied op vekaansie naor Griekenlaand? Now het hi'j daorover een bulte kritiek over him henne kregen, mar hoe positief zol et juust wardeerd west wezen as hi'j doe mit de hiele huusholing veur een weke in een zoemerhusien op de Roggebarg in Appelscha zeten hadde!

D'r vaalt trouwens wel wat meer te zeggen over disse uutspraoke van de keuning. Veur mi'j is d'r niet zo stark een kleuve tussen de stad en et plattelaand. Et is meer een kleuve tussen poletiek Den Haag en de rest van et laand. Zo heb ik bi'jgelieks de indrok dat et grootste pat van de slaachtoffers van de toeslaggenaffaire in de raandstad wonen zullen.

Ok bin in die raandstad reletief meer meensken ofhaankelik van blokverwaarming en wonen d'r ok meer studenten. Beide groepen wo'n tekot daon bi'j de twie keer 190 an energietoeslag. Zi'j hebben daor ommers gien recht op.

En plattelaanders kun dan bi'jtieden wel bi'j poletiek Den Haag klaegen over de instroom van meensken uut aandere lanen in heur gemienten, mar as zi'j iene dag in Amsterdam of Rotterdam ommestapt hebben dan gaon heur de ogen wel eupen.

Nee, et plattelaand huuft him niet tekot daon te vulen deur de vier grote steden in oons laand. Daor wo'n de besluten niet neumen over et privatiseren van bedrieven, over et anleggen van spoortrejekten of et boren van gas in Grunningen.

In de raandstad woont minder as de helte van Nederland, mar in poletiek Den Haag is de raandstad flink oververtegenwoordigd. Zolange bi'j verkiezings niet et distriktestelsel hanteerd wodt zal de kleuve tussen poletiek Den Haag en et plattelaand bestaon blieven.

Daor zal een kasttoespraoke van de keuning niet vule an veraanderen kunnen en al hielemaole niet as hi'j de raandstad apat zetten blift van de aandere regio's."