Dit wie âldjiersnacht: gjin grutte ynsidinten, wol in plysje ferwûne

Op in camping oan de Strandweg yn Lauwerseach baarnde in auto út. De brânwachten fan Eanjum en Zoutkamp binne útriden foar de brân. It fjoer wie rap ûnder kontrôke, mar fan de auto bleau net folle oer.

Op De Lemmer stie in skuorre oan de Jacob de Rookstrjitte yn 'e brân. De flammen kamen al by it dak, mar troch fluch hanneljen fan de brânwacht koe slimmer foarkaam wurde.

De brânwacht fan Balk hat noch baarnend ôffal yn 'e Balkster Bosk oanpakt. En ek by de Klaverflat yn Boalsert stie in bulte ôffal yn 'e brân.

De brânwacht fan Surhústerfean ried út foar in brân oan de Warmoltsstrjitte yn De Harkema, mar it die bliken dat it om in kontrolearre freugdefjoer gie. Letter hawwe sy wol yn 't spier west oan de Pauloane, dêr't oerslach fan baarnende konifearen op in skuorre foarkaam waard.

De brânwacht hoechde him yn de earste oeren fan 2023 net dwaande te hâlden mei al te grutte putten, al stie der wol op ferskate plakken wat yn 'e brân.

Oan de Gealanden hat de Ljouwerter brânwacht in ûndergrûnske kontener mei wetter folrinne litten, om't dy yn 'e brân stie en der flink wat reek frijkaam. Oan de Tramstrjitte yn Nijlân barde ek soks, mar dan mei in kleankontener ûnder de grûn.

Fierder hat yn Wytmarsum in bulte houtôffal oan de Easthimmerwei yn 'e brân stien. En yn Easterein is in auto oan de Sibadawei útbaarnd, dêr't de brânwacht foar útriden is.

Yn Marrum wie de mobile ienheid fan de plysje oproppen neidat minsken yn in doarp in fjoerke stookt hiene op in krúspunt. Doe't brânwachtminsken dat fjoer útmeitsje woene, soe der in driigjende sfear ûntstien wêze. In eintsje fierderop stiene meardere plysjebuskes, mar de ME hoegde net yn aksje te kommen.

Ien jier lyn wie dat oars. Doe wie der op deselde plak yn Marrum ek in brantsje, mar doe is de ME wol yn aksje kaam.

Ljouwert rint stadichoan fol mei stappers. Se sjogge foarút op in moai 2023. "We geane fan it positive út!"

Yn Burgum waait it hurd, mar dêrom wurdt der net minder fjoerwurk ôfstutsen.

Boargemaster Jeroen Gebben fan Tytsjerksteradiel pleitet foar mear kollektyf fjoerwurk, sa't dat yn Earstermar holden wurdt dit jier. Hy neamt sa'n mienskiplik feest in moaie gedachte, dy't op mear plakken opfolging fertsjinnet.

It is hjoed op de dei ôf fiif jier lyn dat Eastermar in miljonêrsdoarp waard: doe foel de kanjerpriis fan de postcode-lotterij yn dat doarp.

Yn it sikehûs fan It Hearrenfean binne op âldjiersdei meardere minsken behannele dy't ferwûne rekke binne mei karbidsjitten. Guon wiene slim ferwûne. Dat seit boargemaster Tjeerd van der Zwan fan de gemeente Hearrenfean.

De boargemaster is yn it sikehûs Tsjongerskâns. Krekt nei middernacht wie it dêr rêstich, seit er, mar earder op de dei wie dat oars.

Yn Ljouwert telden we ôf nei 2023.

Fryslân giert 2023 knallend yn. Yn Ljouwert klinkt al mear as in kertier sûnder ophâlden it lûd fan fjoerwurk. Fanút de hiele stêd is it ljocht te sjen.

22 doarpen yn de gemeente Noardeast-Fryslân ha fan no ôf offisjeel in Fryske. Dêrmei wurdt in beslút fan de gemeenteried nei oardiel jier fan krêft. Kosten? 448.000 euro.

Wa't no ien fan dy doarpen ynrydt, sil dêr nei alle gedachten noch wol de âlde namme op it boerd sjen. De measte buorden wurde de kommende tiid pas ferfongen en ek net allegear. Guon buorden binne noch net iens klear.

De boargemaster fan It Hearrenfean meldt dat it de lêste âld-en-nij-tsjinst is foar wykplysje Johannes Bron. Dy hâldt it kommend jier op by de plysje.

Foar Van der Zwan sels is it ek de lêste âld-en-nij tsjinst as boargemaster fan Hearrenfean. Hy nimt kommend jier ôfskied. Van der Zwan is op dit stuit de langstsittende boargemaster fan Fryslân.

De Fryske brânwacht is rûnom yn de provinisje warber. Under oare fanút Frjentsjer, Hurdegaryp, Boalsert, Eastermar, It Hearrefean en It Amelân kamen meldingen fan lytse brantsjes, meldt in wurdfierder fan de Fryske brânwacht. "Het loopt de hele avond door."

Alle kazernes yn de provinsje binne konsinjeerd, meldt de brânwacht. Dat wol sizze dat der minsken klear steane om oproppen te wurden. Yn guon gefallen binne se op de kazernes sels, mar yn oare gefallen binne se thús.

By it ôfstekken fan fjoerwurk by in wenning oan de Handwerkerszijde yn Drachten is sneontejûn in jong bern slim ferwûne rekke. It slachtoffer is nei it sikehûs brocht, lit de plysje witte.

It gie mooglik mis by it ôfstekken fan karbid, mar de plysje kin dat op it stuit noch net befêstigje. "Het ongeval vond op privéterrein plaats rondom een woonhuis", seit in plysjewurdfierder. Neist in ambulânse kaam ek in mobyl medysk team nei de wenning.

De brânwacht hat fannejûn de Aldehou yn Ljouwert kontrolearre. Efkes nei sân oere kaam in melding binnen fan in mooglike brân yn it gebou. Uteinlik die bliken dat der neat oan 'e hân wie.

'Wy Kam Fram Fryslân' fan De Hûnekop en Oele Plop stiet dit jier op nûmer 1 yn de Fryske top 100. Leadsjonger Emiel Stoffers hie in grutte kampanje holden om it nûmer op ien te krijen.

It wie dit jier in close call tusken de nûmers twa en trije. De Kast mei 'In nije dei' krige krekt wat mear stimmen as 'Cliffs of Moher' fan Gurbe Douwstra. Dat nûmer stie al alve kear op nûmer ien yn de Fryske top 100.

Rolling Home sakket mei 'Fries om utens' fan plak twa nei acht. Ferline jier stienen se heech fanwege it ferstjerren fan gitarist en gesicht fan Rolling Home, Hans Faber. It ferske stie yn 2020 ek al op plak acht.

De fjoerwurkshow fan it pleatslik belang op De Gordyk wurdt ferset nei moarn fanwegen de waarsomstannichheden. It fjoerwurk wurdt no ôfstutsen op nijjiersdei om 21.00 oere.

Yn it gebou dat tsjin de tsjerke yn Mildaam oanboud is ha minsken út Oekraïne ûnderdak fûn. Roelof Liemburg melde him oan op de site fan Omrop Fryslân foar in ferrassingspakket.

Liemburg skreau: "Wy moatte sjen litte dat wy neist harren steane en omtinken om harren ha: wy kinne harren fertriet en soargen net weinimme, mar wol witte litte dat wy it sjogge. Litte wy it wurd 'mienskip' ynhâld jaan troch sjen te litten dat sy dêr sa lang as nedich is byhearre. It is in drip op in gleone plaat, mar as jo krekt op it plak fan dy drip steane, kin it ferdomd lekker wêze."

Mei de jierwiksel jildt der yn de provinsjes Fryslân en Noard-Hollân koade giel oant 03.00 oere. It KNMI meldt dat der sneontejûn en yn de rin fan de nacht kâns is op swiere wynstjitten fan 80 oant 90 kilometer yn it oere.

De wynstjitten komme út it súdwesten, seit it KNMI. Yn de rin fan de nijjiersnacht moat de wyn stadichoan ôfnimme.

Op it parkearterrein by v.v. Burdaard wurdt omraak knald. Wessel Wagemakers nimt ús efkes mei oer it nije karbidfjild fan it doarp. Burdaard die it karbidsjitten altyd op in lyts fjildsje, mar dat wie minder geskikt.

It freugdefjoer yn Burdaard giet hjoed net troch. Dat hat de gemeente Noardeast-Fryslân bekend makke. De gemeente fynt it yn dat plak te gefaarlik. De wyn stiet ferkeard en de fjoerkontener stiet tichtby hûzen. De fjouwer oare freugdefjoeren yn de gemeente geane wol troch, al wurde se wol earder oanstutsen.

Yn Ferwert en Blije binne se no al dwaande en yn Hantum en Reitsum sil dat om fiif oere fan 'e middei barre. Omdat der moarn better waar ferwachte wurdt, mei Burdaard it freugdefjoer moarntemiddei wol ôfstekke.

De gemeente Noardeast-Fryslân warskôget besikers wol rekken te hâlden mei it saneamde 'vliegvuur' dat fan it freugdefjoer ôfkomt. Dat kin gefaarlik wêze at jo bygelyks syntetyske klean oan hawwe.

In stânbyld fan de wolf út Wolvegea is boppe wetter kaam yn De Haule. De âldjiersferiening hie it byld yn de nacht fan tiisdei op woansdei meinommen. De skulptuer stiet symboal foar de lêst sinjalearre wolf yn Wolvegea yn 1712. No't de wolf werom is yn Fryslân woe de âldjiersploech fan De Haule dêr omtinken foar freegje. "Nu hij weer terug is en voor veel ophef zorgt, willen wij de aandacht vragen voor de vele dierlijke slachtoffers van de wolf. Vee in de wei past geen wolf bij."

It wiene drokke dagen foar fjoerwurkferkeapers. Ferslachjouwer Johanna Brinkman is yn Dokkum by de winkel fan Gerrie en Astrid. Der wie hast gjin tiid foar kofje en iten de ôfrûne dagen. It sierfjoerwurk is yn harren winkel it populêrst.

Rûnom yn de provinsje wurdt hjoed mei karbid knald. Yn Drachten mochten de karbidsjitters om 10.00 oere op ferskate lokaasjes los.

Ek op It Hearrenfean binne karbidsjitters warber, sa as op it parkearterrein by fuotbalferiening Nieuweschoot.

Hûnderten Friezen ha oaren opjûn foar in ferrassingspakket fan Omrop Fryslân. It binne stik foar stik ferhalen fan bysûndere minsken. Yn Boerum wenje Renze en Ruurdtsje de Haan. Ruurdstje hat har man opjûn foar in ferrassingspakket omdat hy alle aldjiersnachten fan nachts 01.00 oere oant de oare moarn 07.00 oere it doarpshûs iepen hat foar allinnichsteanden en de jongerein. Sa sweve se nachts net om op strjitte.

It is dan altiten hiel gesellich en waarm by Renze. Sliepe is der hast net by foar Renze, want op nijjiersdei bout hy mei in groep frijwilligers in tinte foar kofje en snert op by de haven fan Boerum. Hy organisearret dêr al foar de 25e kear de Nijjiersdûk en dêr docht hy sels ek noch oan mei.

De stellen letters T, O en P fan it NPO Radio 2 Top 2000-logo by Beeld & Geluid yn Hilversum binne werom, seit de NPO sneon. De letters waarden yn de nacht fan woansdei op tongersdei stellen troch âldjiersferiening De Geitefok út Aldeberkeap as nijjiersstunt.

"We vinden het TOP dat de letters, met dank aan de politie en de coöperatieve houding van de 'letterleners', net op tijd terug zijn om de lijst van heel Nederland in stijl af te kunnen sluiten", seit stjoerdermanager Peter de Vries fan de NPO.

De Geitefok makke freedtejûn in earerûntsje troch Aldeberkeap mei de letters. De feriening sei al de letters sneontemoarn werom te setten foar de doar fan it Top 2000 Café. De NPO die oanjefte en de plysje liet witte it IM frege te hawwen in strafrjochtlik ûndersyk te starten.

Fansels mei it karbidsjitten yn Fryslân net ûntbrekke op âldjiersdei. Op dizze kaart binne 322 lokaasjes te finen dêr't mei karbid sketten wurdt. Hielendal kompleet is de kaart net, want Eaststellingwerf ûntbrekt. Dat komt om't it karbidsjitten yn dizze gemeente fergunning- en meldingsfrij is.

De Oliebollenloop is fan start gien op De Gordyk. Mear as 150 bern ha har ynskreaun foar de Kidsrun. Fan 'e middei binne der ek noch ôfstannen foar de oare 1.500 dielnimmers, nammentlik de 10 kilometer en de 4 mijl. Der binne ferskate kategoryen foar froulju, manlju en bedriuwen. De start is by sportsintrum Kortezwaag op De Gorredyk.

Yn Donkerbroek ha se in grutte einekop delset as âldjiersstunt. De einekop komt út Waddinxveen. De âldjiersploech fan Donkerbroek protestearret tsjin it wenningtekoart yn it doarp en hat in boadskip foar de gemeente Eaststellingwerf. "Gemeente stop met dat gesnater. Bouw huizen voor eigen jeugd voor later."

De âldjiersstunt fan Easterein is bekend. Yn it doarp binne de fierrekikers opdûkt dy't út Makkum weihelle wiene. De âldjiersploech fiert it 25-jierrich jubileum en sjocht mei de stunt posityf nei de takomst. "De takomst sjogge wy troch dizze fiersjoggers posityf temjitte. Der komt in tiid dan kinne wy dizze krisistiid efter ús litte."

It is âldjiersdei en dat betsjut mar ien ding: de Fryske top 100! De útstjoering mei de bêste Fryske muzyk is om 07.00 oere úteinset by Omrop Fryslân. Der binne dit jier 56.440 stimmen útbrocht op de crème de la crème fan Fryske boaiem. Wa sil der dit jier op nûmer ien stean?

De hiele dei is der ek in ferslachjouwer op 'en paad troch de provinsje om ferrassingspakketten út te dielen. De útstjoering duorret oant 18.00 oere.

Op ferskate Waadeilannen fiere se hjoed ek âld en nij, mei bysûndere eveneminten. Op It Amelân bygelyks organisearje se it jierlikse krystbeamsmiten, yn it plantsoentsje fan Ballum. Der binne trije kategoaryen: bern, manlju en froulju. Meist sa faak in beam smite ast wolst en de winner krijt in beker.

Op Flylân ride eilanners om tolve oere mei motors en brommers sûnder útlit troch it doarp. It is in tradysje dy't te fergelykjen is mei fjoerwurk ôfstekke en karbidsjitte: mei in soad leven om kweade geasten te ferjeien.

In stik rêstiger sil it fannacht wêze op Skiermûntseach, want foar in grut part fan dat eilân jildt in fjoerwurkferbod. It giet om in proef. En dy wurdt yn it kommende jier evaluearre.

Aldjiersploech De Geitefok út Aldeberkeap hat tasein de meinommen Top 2000-letters fan it Mediapark yn Hilversum hjoed werom te bringen. Freedtejûn ha de letters T, O en P noch in earerûntsje makke troch it doarp.

De NPO hie oanjefte dien fan de stellerij. De plysje fan Hilversum wie ek net bliid mei de aksje, omdat dy in soad wurk hat fan de stellerij. De Geitefok ûntkende earst en woe de jierwiksel ôfwachtsje, mar sil de letters nei oerlis mei de NPO en de plysje earder werombringe.

Gewoanwei wurdt de stunt pas mei de jierwiksel bekend, mar dochs neamt foarsitter Jan-Bart Hof it in "geslaagde stunt". Mei de stunt woe de âldjiersferiening in sinjaal ôfjaan dat Nederlân grutter is as allinnich de Rânestêd.

"Wij zouden het top vinden als de politiek, maar ook de media, wat meer oog krijgen voor wat er speelt op het platteland. Wij willen meer zijn dan alleen protesterende boeren. Praat niet over ons, maar met ons. Nederland heeft veel meer te bieden dan alleen de grote steden."

Goeiemoarn en wolkom op dizze lêste dei fan 2022. Yn dit blog folgje we it nijs oangeande âldjiersdei en nijjiersdei yn Fryslân.