Iuwenâld weet wurdt 'mennobôle' yn Wytmarsum

Menno de Vries is de inisjatyfnimmer fan de 'mennobôle'. Hy kaam in pear jier lyn yn kontakt mei in man yn Ohio (Amearika) dy't dêr in âlde weetsoart ferboude: Turkey Red Wheat. It is bekend dat dizze weetsoart earder yn Oekraïne ferboud waard. It is in typysk ferhaal fan de menisten.

Se moasten faak flechtsje en namen op dy flecht siedden mei: weetsied en ek oare nôtsiedden. As se dan in nij plak fûn hiene dêr't se in bestean opbouwe woene, siedden se it sied en koene sa har eigen iten ferbouwe. "Nôt is libben", leit Menno de Vries út. Hy hat him yn dit ferhaal ferdjippe.

De Vries is sels menist en hiel entûsjast oer it sukses fan syn inisjatyf. Yn 2018 ferboude hy foar it earst de Turkey Red Wheat. De opbringst wie noch net om oer nei hûs te skriuwen, want der kaam in skimmel yn de planten. Dat is ek de reden dat der tsjintwurdich spuite wurdt tsjin de skimmel en de opbringst is dan no ek folle grutter.

Maatskip Odinga hat no ek Turkey Red Wheat op it lân stean, sadat der takom hjerst noch mear weet ferwurke wurde kin ta bôle.

Christa Bruggenkamp is mûnder yn Wytmarsum ûnder de namme 'Mevrouw de Molenaar'. Sy meallet de kerrels fan de weet en dat is echt oar wurk as it meallen fan gewoane weet. "Deze tarwe heeft een hele fijne korrel. Dat maalt anders en dat zorgt ook voor ander meel en bloem", fertelt Bruggenkamp.

Fan it moal en de blom wurde mennobôlen en mennodúmkes bakt. Dat docht se ûnder yn de mûne dêr't de bakkerij sit. Op freed en sneon bakt Bruggenkamp dêr mei bakker Jippe Braaksma ambachtlike bôle en banket.

De mennobôle dy't fan it oernôt makke wurdt, is in rûne bôle mei in hiel eigen karakter. It is in ambachtlike bôle dy't duorsum makke is troch de tige koarte linen.