- वि.सं २o८o कार्तिक २ बिहीबार
द्वन्द्वग्रस्त इजरायलबाट उद्धार गरेर भारतको राजधानी नयाँदिल्ली हुँदै सातजना नेपाली महेन्द्रनगर आइपुगेका छन् । बिहीबार बिहान ९ बजेतिर दिल्ली हुँदै उनीहरू नेपाल आइपुगेका हुन् ।
इजरायलको तेलअभिभबाट मंगलबार बिहान ९ बजे भारतीय स्पाइस जेट विमानमार्फत १८ जना नेपालीलाई उद्धार गरेर ल्याइएको थियो । जसमध्ये सातजना गड्डाचौकी नाका भएर नेपाल प्रवेश गरेका हुन् । पाँचजना दिल्लीबाट काठमाडौं आएका थिए । दुईजना आफ्नै खर्चमा घर फर्किए भने एकजना मुम्बई गएका छन् ।
जिल्ला प्रहरी कार्यालय कञ्चनपुरका प्रमुख कमल थापाले इजरायलबाट दिल्ली पुगेकामध्ये सातजना मात्रै गड्डाचौकी नाका भएर महेन्द्रनगर आइपुगेको बताए । कैलालीको टीकापुर नगरपालिका– १ का नन्दसिंह भुल, मोरङ उर्लाबारी– ६ का निश्चल श्रेष्ठ, काठमाडौंका राजकुमार मानन्धर, श्वेता गुरुङ, ममता थापा, दिलकुमारी अधिकारी र लक्ष्मण दियाल नेपाल आइपुगेका हुन् । उनीहरूलाई प्रहरीले महाकाली यातायात कम्पनीसँग समन्वय गरेर निश्चित गन्तव्यसम्म पुर्याउने भएको छ । कञ्चनपुर प्रहरी प्रमुख थापाले टीकापुर र मोरङका दुईजना युवकलाई महाकाली यातायात कम्पनीको बसमार्फत गन्तव्यमा पठाइने बताए ।
काठमाडौंका पाँचजनालाई महाकाली यातायातको सवारीसाधनमार्फत धनगढी एयरपोर्टसम्म पुर्याइने भएको छ । महाकाली यातायात कम्पनीका अध्यक्ष डम्बरदत्त पन्तले दिल्ली रुटबाट महेन्द्रनगर पुगेका सातैजना नेपालीलाई निश्चित गन्तव्यमा पुर्याइएको बताए । प्यालेस्टाइनी हमास समूहले इजरायलमा आक्रमण गरेपछि त्यहाँ रहेका नेपाली नागरिक त्रसित भएर फर्किने क्रम जारी छ ।
सातजना नेपालीलाई दिल्लीस्थित नेपाली दूतावासले सवारीसाधन प्रबन्ध गरेर महेन्द्रनगर पुर्याएको थियो । २० असोजमा हमास समूहले इजरायलमाथि हमला गर्दा सुदूरपश्चिम विश्वविद्यालयका १० विद्यार्थीको निधन भएको थियो । भीमदत्त नगरपालिका– ३ भाँसी महेन्द्रनगर कञ्चनपुरका विद्यार्थी विपिन जोशी अझ बेपत्ता छन् । जोशीलाई हमास समूहले अपहरण गरेको आशंका गरिएको छ ।
इजरायलमा असुरक्षित महसुस गरेपछि मातृभूमि फर्किएँ : श्वेता गुरुङ
द्वन्द्वग्रस्त मुलुकबाट मातृभूमि आइपुगेका नेपाली नागरिकले खुसी व्यक्त गरेका छन् । उनीहरूले आफूहरू बसेको स्थानमा द्वन्द्व नचर्किए पनि त्रासले स्वदेश फर्किएको बताएका छन् । १४ वर्षदेखि इजरायलमा कार्यरत काठमाडौंको टोखा नगरपालिका– ८ की श्वेता गुरुङले मातृभूमि आइपुगेपछि खुसी व्यक्त गरिन् । उनले आफू १४ वर्षदेखि इजरायलको जेरुसेलममा कार्यरत भएको बताउँदै पहिलोपटक ठूलो क्षति भएको अनुभव सुनाइन् । त्यहाँ बस्न असुरक्षित भएपछि स्वदेश फर्किएको उनले बताइन् । ‘१४ वर्षदेखि इजरायलमा कार्यरत थिएँ । अहिलेसम्म यति ठूलो क्षति भएको देखिेको थिइनँ । सन् ०१२ र ०१४ मा पनि भइराखेकै थियो, तर यति ठूलो अहिलेसम्म भएको थिएन,’ उनले भनिन्, ‘आफ्नो भूमि नेपाल सकुशल आइपुगियो, खुसीको सीमा नै छैन, धन्यवाद नेपाल सरकार ।’
