- वि.सं २o८१ जेठ ५ शनिबार
फर्जी कागजातमा नेपाली युवालाई भिजिट भिसामा विदेश पठाउने धन्दामा संलग्न अध्यागमनका अधिकृतविरुद्ध लिखत किर्ते तथा संगठित अपराधअन्तर्गत मुद्दा दायर गरिएको छ । काठमाडौं उपत्यका अपराध अनुसन्धान कार्यालयका अनुसार त्रिभुवन अन्तर्राष्ट्रिय विमानस्थलस्थित अध्यागमन कार्यालयका अधिकृत नरवीर खड्का र ताराबहादुर कुँवरविरुद्ध मुद्दा दायर गरिएको हो । दुईमध्ये नरवीरलाई प्रहरीले पक्राउ गरिसकेको छ । ताराबहादुर भने फरार छन् । उनीविरुद्ध पक्राउ पुर्जी जारी गर्न कार्यालयले अदालतसमक्ष माग गरेको छ ।
अनुसन्धान कार्यालयका प्रवक्ता एसपी रवीन्द्र रेग्मीले अध्यागमनका अधिकृतविरुद्ध लिखत किर्ते तथा संगठित अपराधअन्तर्गत मुद्दा दायर भएको जानकारी दिए । ‘लिखत किर्तेमा अध्यागमन कार्यालयका केही अधिकृत संलग्न रहेको खुलेको छ । उनीहरूविरुद्ध लिखत किर्ते तथा संगठित अपराधअन्तर्गत मुद्दा दायर भएको छ । घटनाको अनुसन्धान जारी छ,’ उनले भने ।
धन्दामा अध्यागमन कार्यालयकै अर्का शाखा अधिकृत विमल पौडेल पनि संलग्न रहेको खुलेको छ । उनले पनि ट्राभल एजेन्सीबाट पटक–पटक गरी करोडभन्दा धेरै घुस रकम बुझेको प्रहरीको अनुसन्धानबाट खुलेको छ ।
पक्राउ हुने भएपछि अहिले उनी फरार छन् । उनी पूर्वगृहसचिव महेश्वर न्यौपानेको सिफारिसमा विमानस्थलस्थित अध्यागमन पुगेका थिए । उनी यसअघि न्यौपानेको निजी सचिवसमेत रहेका थिए । सरुवापछि पनि न्यौपानेकै दबाबका कारण उनी पुनः विमानस्थलमै कार्यरत रहेका थिए ।
फर्जी कागजातका आधारमा नेपाली युवालाई विदेश पठाउन सघाउने धन्दामा नेपाल वायु सेवा निगमका कर्मचारी पनि संलग्न रहेको खुलेको छ । धन्दामा संलग्न रहेको पाइएपछि प्रहरीले निगमका अधिकृत ४२ वर्षीय होमनाथ पोखरेल र सुब्बा अरवीन्द्र यादवलाई पक्राउ गरेको छ ।
प्रहरीका अनुसार पोखरेलले रोलेक्स ट्राभलका कर्मचारी सञ्जय तामाङ र राजकिशोर साहबाट १८ लाख रुपैयाँ घुस बुझेका थिए । उक्त रकम रोलेक्सका सञ्चालक देवराज खनालले उपलब्ध गराएका थिए ।
त्यस्तै, निगमका सुब्बा यादवले अन्ट्राट्रिप ट्राभलका सञ्चालक ३० वर्षीय मनुराज चौधरीबाट १२ लाख रुपैयाँ घुस बुझेका थिए । घटनमा संलग्न रहेकामध्ये ३७ अभियुक्तलाई प्रहरीले पक्राउ गरिसकेको छ ।
